Prentisiaid yn dechrau ar eu siwrnai i ategu dyfodol niwclear Gwyndod

Mae’r garfan gyntaf o brentisiaid Rolls-Royce SMR ar Ynys Môn, a leolir gerllaw gorsaf arfaethedig Gwyndod, wedi dechrau ar eu siwrnai niwclear yn swyddogol, gan nodi carreg filltir bwysig o ran meithrin y sgiliau sy’n angenrheidiol ar gyfer cyflawni’r rhaglen Adweithyddion Modiwlar Bach (SMR).

Mae deg o brentisiaid lleol wedi ymuno â thîm Diogelwch a Materion Rheoleiddio Rolls-Royce SMR ar adeg dyngedfennol yn hanes y sefydliad wrth iddo ddechrau adeiladu tair uned ar safle Gwyndod, dan gontract a lofnodwyd gyda Great British Energy – Nuclear yn gynharach eleni.

Lleolir y prentisiaid yng Ngholeg Menai, Llangefni, a byddant yn elwa ar addysgu arbenigol a chyfleusterau gwych Grŵp Llandrillo Menai. Byddant yn ategu trefniadau cydymffurfio a safonau rheoleiddio a diogelwch ledled y rhaglen SMR, yn ogystal â chwarae rôl bwysig o ran trawsnewid y modd y caiff prosiectau niwclear eu cyflawni trwy gyfrwng technoleg niwclear sicr ac i’w ymddiried ynddo, modiwlareiddio a dull a ‘adeiladwyd mewn ffatri’.

Tommy Evans, Peiriannydd Peryglon Mewnol Rolls-Royce SMR a chyn-brentis prosiect Wylfa Newydd Horizon, sy’n arwain rhai o’r prentisiaid newydd:

“A minnau wedi dechrau ar fy siwrnai fy hun fel prentis yn yr ardal, rydw i’n gwybod o’r gorau pa mor bwysig yw cyfleoedd gwirioneddol ar gyfer y rhanbarth hwn,” meddai. “Mae datblygu doniau yma ar Ynys Môn yn cynnig llwybr uniongyrchol i’r unigolion uchelgeisiol hyn at yrfaoedd hynod fedrus, gydol oes. Trwy gael profiad ymarferol yn ymwneud â diogelwch niwclear, rheoli risgiau a chymeradwyaeth reoleiddiol, byddant yn ategu ein cynlluniau ynni glân ehangach yn uniongyrchol, gan sicrhau ar yr un pryd bod Gogledd Cymru wrth galon y cyfnod niwclear newydd.”

Caiff y prentisiaid eu hategu gan gymhwyster Lefel 3 mewn Peirianneg. Byddant yn astudio’n llawn-amser yn Llangefni am 12 mis cyn cymhwyso’r pethau a ddysgwyd trwy brofiad ymarferol ar draws y rhaglen SMR.

Medd Aled Jones-Griffiths, Prif Swyddog Gweithredol Grŵp Llandrillo Menai: “Mae croesawu’r garfan gyntaf hon o brentisiaid Rolls-Royce SMR i Goleg Menai yn garreg filltir gyffrous i Grŵp Llandrillo Menai ac yn arwydd clir o barodrwydd y Grŵp i sicrhau y bydd gweithlu medrus a chymwysedig ar gael yn lleol i ddiwallu’r galw ac i gynorthwyo i ddatblygu Gwyndod yn llwyddiannus.

“Trwy gyfuno addysg dechnegol o’r radd flaenaf yn Llangefni gyda phrofiad ymarferol ar y rhaglen SMR, rydym yn cynnig llwybr uniongyrchol i bobl ifanc leol at yrfaoedd hynod fedrus ar garreg eu drws. Mae helpu ein cymunedau lleol i ennill y profiad sy’n angenrheidiol i ategu prosiectau mawr fel Gwyndod wrth galon a chraidd ein dull, ac edrychwn ymlaen at gynorthwyo’r prentisiaid hyn wrth iddynt ddechrau ar eu siwrnai.”

Ymunodd Carwyn ar ôl cwblhau ei flwyddyn gyntaf yn astudio Safon Uwch, ac mae’n dilyn yn ôl troed y teulu gan fod ei dad eisoes yn gweithio ar safle Wylfa. Meddai: “Mae’n gyfle gwirioneddol wych ac rydw i’n llawn cyffro o weld y pethau a ddaw i ran yr ynys yn sgil y prosiect. Gwych o beth yw gallu dilyn yn ôl troed fy Nhad a bod yn rhan o’r cyfle anhygoel hwn.”

Mae Casey, a arferai fod yn Rheolwr Hamdden yn Llanrwst, o’r farn bod y cynllun yn ddechrau newydd. “Dydyn ni ddim yn cael llawer o gyfleoedd o’r fath yn yr ardal hon, felly mae’n wych eu bod wedi dod â rhywbeth newydd i’r ynys a’u bod wedi rhoi llu o gyfleoedd i bobl ifanc leol. Dyma drywydd newydd i mi ac mi fydd yn siwrnai hynod ddiddorol a chyffrous.”

Yn ôl Tauni, sydd wedi camu yn ei blaen o gwrs Lefel 3 mewn Adeiladu yng Ngholeg Menai: “Cefais flas mawr ar iechyd a diogelwch yn fy nghwrs blaenorol ac roeddwn i eisiau cymhwyso’r wybodaeth at yrfa yn y dyfodol. Rydw i’n edrych ymlaen at weithio yn y diwydiant niwclear yma, gan ei fod yn lleol i mi.”

Soniodd Euros, sydd hefyd wedi ymuno o Goleg Menai, am fynediad at y diwydiant. “Roedd yn gyfle i weithio i gwmni mor fawr, cael cyflog tra’n dysgu, ennill sgiliau newydd ac ymuno â’r diwydiant. Mae’n lle gwirioneddol wych i ddechrau, yma ar garreg fy nrws.”

Ychwanegodd Gwenno, sy’n ymuno’n syth ar ôl gorffen astudio Safon Uwch: “Cefais fy nenu ato oherwydd y cynllun newydd ar gyfer Wylfa. Rydw i’n edrych ymlaen at ennill sgiliau newydd a dechrau ar y siwrnai hon sy’n rhoi Gogledd Cymru wrth galon a chraidd y pontio at ynni glân.”

Mae’r garfan newydd yn golygu bod 51 o brentisiaid Rolls-Royce SMR yn cefnogi’r prosiect ledled y DU. Dros oes y prosiect, disgwylir y bydd mwy na 300 o brentisiaid yn cael eu cyflogi, gan helpu i feithrin y sgiliau sy’n angenrheidiol i esgor ar y genhedlaeth nesaf o seilwaith ynni niwclear yn y DU.

Mae’r prentisiaid yn dechrau ar eu siwrnai yn ystod cyfnod o dwf cyflym yn hanes Rolls-Royce SMR. Yn dilyn y cytundeb gyda Great British Energy – Nuclear, mae’r busnes wedi llofnodi cytundeb gwaith cynnar gyda’r cwmni cyfleustodau ČEZ o’r Weriniaeth Tsiec, ar gyfer gwaith yn Temelín; ac ym mis Mehefin, dewiswyd Rolls-Royce SMR gan Videberg Kraft i adeiladu Adweithyddion Modiwlar Bach ar benrhyn Värö ar arfordir gorllewinol Sweden.